「醫護行者嘅願景係要消除社會嘅健康不平等，令在職低收入人士同埋家庭有機會接觸有質素嘅醫療服務。我係呢度嘅其中一位營養師，負責為社區入面嘅清潔工友提供食物安全同埋營養學嘅資訊。我嘅崗位要好主動咁去同陌生人接觸。有啲工友一開頭可能唔係咁願意同我講嘢，但係花啲時間同埋耐性，佢哋都會慢慢同我熟絡。最緊要係令佢哋覺得我有聽緊佢哋講嘢，用心留意同埋尊重佢哋。喺疫情期間，呢班清潔工為我哋社區嘅安全同埋衛生作出咗好重要嘅貢獻，但係佢哋往往會忽視自己嘅健康。好多人會有個錯覺，覺得健康嘅生活方式係要有錢先做得到。但係我想講嘅係，就算係平靚快嘅餐單，都可以係有營養嘅。工作嘅時候，我每日都要練習從工友嘅角度去諗。好多時我哋以為佢哋需要嘅嘢，其實並唔係佢哋真正需要嘅。同理心唔係同情心，而係尊重，係要尊重對方嘅睇法，從佢哋嘅角度去搵解決方案。先聆聽，後幫忙係好重要㗎 ！」
「我嘅第一份工係做銀行職員，喺個櫃檯後面做嘢。嗰份工好穩定，但係我覺得做嘅嘢係一式一樣，過咗一段時間我真係開始問自己喺度做緊乜。諗咗一輪之後，我覺得自己對營養行業有熱誠，所以就決定轉行。我亦好鍾意食嘢，想將食得好同埋食得健康嘅快樂分享俾人。喺醫護呢度做嘢，最有滿足感嘅地方就係可以同唔同嘅人同埋社群接觸。我好相信每一個人都可以逐步改善自己嘅健康，無論係喺飲食、睡眠或者係做運動嘅習慣上面都可以做少少改變。好多人都唔識點樣去食得健康或者改善佢哋嘅身心健康，對我嚟講，最緊要係搵到一個啱嘅平衡，同我哋生活好多方面一樣。當然我都會保持自己身體健康啦！放假嘅時候，我鍾意出外同埋郁吓，我會打排球，去行山，亦都鍾意跳 hip hop 舞㗎 ！」
感謝Hong Kong Shifts與陳廷驊基金會的協助，介紹醫護行者營養學家Chelsy與清潔工友的故事。我們整個團隊相信慈之以行，走入社區，才能構建健康城市。
—————————————————————-
慈之以行計劃由陳廷驊基金會 X Hong Kong Shift 籌辦，希望表揚一班於疫情中默默耕耘嘅NGO 同工，大家可以去Hong Kong Shifts 網站同Facebook，細閱充滿正能量嘅感人故事。
NGO 感人故事
https://www.hongkongshifts.com/compassion-stories 有關陳廷驊基金會:
https://dhchenfoundation.com/