早前《施政報告2024》提及過社區藥房， 有街坊會問社區藥房與藥房又有咩分別呢？係咪只要有個「藥」字嘅店舖都係社區藥房呢？🤨
根據現時定義，藥房同社區藥房並無太大分別，同樣有藥劑師駐守，為市民解答用藥疑問同配發藥物。售賣西藥嘅店舖一般可分類為藥房同藥行，並唔係所有附有「藥」字嘅店舖就等於社區藥房，至於佢地有咩分別，大家可以參考以下嘅講解😉。
咩係藥房？
「獲授權毒藥銷售商」專用的名銜，根據香港法例，店鋪必須持有此牌照先可以使用此名銜。
咩係藥行/藥店/藥坊？
「列載毒藥銷售商」嘅通稱，部分銷售商會使用「藥店」等稱號。一般有售賣傷風感冒藥嘅零售商店都屬於此類別。
點樣分辨呢間店係咪藥房？
係社區內大多有展示「藥房」名銜同「Rx」標誌嘅店舖，都可稱為「藥房」。藥劑師最少要係店舖營業嘅3分之2時間於店內當值，監督藥物銷售💊。
「藥房」於當眼位置會搵到以下文件：
1️⃣ 藥劑師嘅註冊證明書
2️⃣ 列出藥劑師當值時間嘅告示🕘
3️⃣ 已獲《藥劑業及毒藥條例》發出嘅註冊證明書
藥房 v.s. 藥行大不同
藥房
✅使用「藥房」名銜
✅使用「Rx」標誌
✅當值藥劑師駐店
✅可配發醫生處方藥物 (於藥劑師監督下)
✅銷售藥劑師專售嘅受管制藥物
✅銷售不需藥劑師監督銷售嘅一般藥物，如傷風感冒藥
藥行
❌使用「藥房」名銜
=> 可以使用「藥店」等稱號
❌使用「Rx」標誌
❌當值藥劑師駐店
❌可配發醫生處方藥物 (於藥劑師監督下)
❌銷售藥劑師專售嘅受管制藥物
✅銷售不需藥劑師監督銷售嘅一般藥物，如傷風感冒藥
情境題：陳小姐前往了藥行想買抗生素，係咪可行？
↓↓
↓↓
↓↓
↓↓
↓↓
↓↓
答案：根據香港法例，抗生素屬於處方藥物，需手持醫生處方到藥房先配到，藥行係唔可以銷售處方藥物。
到底咩係處方藥物，邊啲藥先可以係社區藥房配到？
一齊睇睇現時香港對於藥物嘅分類同銷售點 ──
處方藥物
必須係註冊藥劑師監督下按醫生處方配售，例如降血壓藥、抗糖尿病藥、鎮靜劑、抗生素等，用於治療較嚴重疾病嘅處方藥。劑量不正確或使用不當，好有可能危害健康。
❗銷售包裝上須標明「Prescription Drug 處方藥物」❗
非處方藥物（需藥劑師監售）
雖然毋須醫生處方，但必須係註冊藥劑師指導同監督下銷售。呢類藥物必須遵照其用法同用量使用，以免危害健康。
❗銷售包裝上須標明「Drug under Supervised Sales 監督售賣藥物」❗
非處方藥物（不需藥劑師監售，又稱非毒藥）
無藥劑師駐守嘅藥房或藥行可自行銷售，例如常見嘅傷風藥、退燒藥或止痛藥等。呢類藥物通常用於治療或紓緩輕微病徵，副作用亦較少。
❗若果使用不當，同樣可能有不良副作用。有任何疑問，建議先向藥劑師或醫生查詢，切忌胡亂用藥❗
💊醫護行社區藥房💊
☎️電話：3596 3141
📞WhatsApp / Signal：6778 9581
📌地址：新界葵涌葵昌路54-56號貿易之都901室
⏰開放時間
星期一：10:30am – 1pm; 2pm – 7:30pm
星期二：9am – 1pm; 2pm – 6pm
星期三：9am – 1pm; 2pm – 6pm
星期四：2pm – 7:30pm
星期五：9am – 1pm; 2pm – 6pm
星期六：9am – 1pm
星期日及公眾假期：休息
*藥房會於閉門時間前15分鐘截龍*
